Strax er teygjanlegt hugtakt. Ekki bara í pólitík, heldur er líka teygjanlegt hvenær menn þurfa að fara að lögum. Að minnsta kosti þeir menn sem hafa tekjur af því að kvelja smágrísi.

Núgildandi dýraverndarlög voru samþykkt í apríl 2013, þau tóku gildi 1. janúar síðastliðinn. Áður hafði þó verið í gildi reglugerð um aðbúnað og heilbrigði svína, allt frá apríl 2011, þar sem bann er lagt við geldingu án deyfingar. Samþykkt og gildistaka laganna hefði því ekki átt að koma svínabændum mjög á óvart. Auk þess eru í reglugerðinni ýmis önnur ákvæði um aðbúnað svína sem enn eru ekki komin til framkvæmdar þótt lögin hafi tekið gildi fyrir tæpum fimm mánuðum.

Svínabændur hafa því haft meira en þrjú ár til að aðlagast því óþægilega viðhorfi að velferð dýra skipti máli.

Nú ætlar yfirdýralæknir að taka þessi mál föstum tökum og byrja strax að sjá til þess að lögunum verði framfylgt. Ekki kannski alveg í hvelli en allavega Vigdísarstrax. Hún ætlar að gefa böðlunum sjö mánuði í viðbót til að „aðlagast“.

Ég vissi ekki að yfirdýralæknir hefði vald til þess að fresta gildistöku laga sem þegar eru í gildi en það er ágætt að vita að einhver hafi þetta vald. Það hefur nefnilega sýnt sig að margir eiga erfitt með að aðlagast þeirri hugmynd að þeir megi ekki berja, nauðga og meiða annað fólk með bitvopnum. Sumir hafa meira að segja atvinnu af því. Ætli yfirdýralæknir geti veitt handrukkurum margra mánaða undanþágu frá lögum eða er það á verksviði landlæknis? Eða einhvers annars? Ég meina, „sársauki“ er afstætt hugtak, næstum jafn afstætt og teygjanlegt og hugtakið „strax“ svo hversvegna ættu ofbeldismenn ekki alveg eins að fá leyfi til að kvelja nokkra í viðbót?