Fórnarlambsvæðingin firrir konur ábyrgð.  Það er ekki bara ósanngjarnt að fólk sæti minni ábyrgð í skjóli kynferðis síns heldur er það líka til þess fallið að viðhalda veikari stöðu kvenna á sumum sviðum.

Ríkjandi er tilhneiging til þess að líta á afbrotakonur og konur sem eru í óreglu sem veikgeðja fórnarlömb sem hafi „leiðst út í“ slæmt líferni. Oft eru geðsjúkdómar, óregla og önnur félagsleg vandamál kvenna skýrð sem afleiðingar af ofbeldi karlmanna. Karlar sem lenda á stofnunum vegna vímuefnavanda, geðveiki og afbrota eiga mun frekar á hættu að vera afgreiddir sem slæmir karakterar.  Konur eru líka síður kærðar og fá vægari dóma en karlar.

Feministar viðhalda þessari tilhneigingu og gera illt verra með því að kenna öllu öðru en konunum sjálfum um atkvæðaleysi kvenna. Mælst er til þess að gengið sé á eftir konum til þess að þær taki að sér ábyrgðarhlutverk. Kynjahallinn í fjölmiðlum er skýrður með kvenfyrirlitningu. Ef konur sækja síður um styrki en karlar þá er það skýrt með því að karlar hafa svo lengi verið vondir við konur að þær hafa bara enga trú á sjálfum sér.